Gira

Gira
kan saimong mga moro
nagbaklay sa kublit
kan sakuyang
likod
siring sa sibidsibid
na minabanga
sa maaskad na tubig
nin kadagatan.
Gira
kan saimong hinangos
nagkamang sa kublit
kan sakuyang
liog
siring sa lipay
na magatol
sa marambong na dahon
kan poon nin lagaylay.
Gira
kan saimong ganot
nagtagdo sa kublit
kan sakuyang
daghan
siring sa uran
na minabuhos gikan
sa kalangitan,
pasiring sa dagang alang.
Gira
kan saimong kusog
nagsirong
sa kadikloman
kan sakuyang
ogma
siring sa garod.
Gira
kan saimong boot
nagwasiwas
sa kairaroman
kan sakuyang
tulak
siring sa bubon
na nagtataong buhay
sa napapahang
kinaban.
Gira
kan ogma.
Gira
kan siram.
Gira
kan girok.
Gira
kan haldat.
Gira
kan kolog.
Gira.

Fenix

Ika Fenix

sa kamatangaan 
natotomtom nganing mabuhay;
kaagahan, magdanay.
An saimong kalag sungo 
sa pugon nin paglalang.
Sa saimong abo
minabutwa olay,
berso, rawitdawit.
Kan saimong kalayo
dinadangdang recuerdo,
pagmati,boot, puso.
Fenix, garo saldang
bangraw sa diklom
kan bangging gadan
sa pagkamoot.

Ako Bitoon

Ako sarong bitoon.
Sakong pagkatomtom
liwanag sa kinaban.
Buhay ko dolot
bako sa sadiri kundi sa kabilogan, 
sa Saro, sa kagabsan,
sa pagkamundag, sa pagkagadan
sa kapinunan, sa kasagkoran.
Bitoon ako, nagkakalayo.
Tinotomtom an sadiri
nganing mabuhay sagkod pa man.

Pagtukdo

An pagtukdo maogma.
Nakakanuod ka na, binabayadan ka pa.
Makulog lang sa payo orog na magbasa
Saka 'pag istudyante an marka hababa.
Alagad an pagtukdo, maogma talaga.
Lalo na pag an bunga kan pagal nahiling mo na.
Mga responsableng soltero, daraga
na sa saimong pag-mango nakanood, nagdakula.
Kaya kun papaladon, ako matukdo na lang.
Dawa an kublit kurundot na asin an payo pano na nin uban,
mahiras kaaraman sagkod magkagurang.

Pagkamoot siring sa minasbad

Hare ka magsalingoy para hilingon

an mga luha na nagraralapagan sa sakuyang lawog.

Ituruhok an duwang mata pasiring sa harayo

asin ilakdang nin marikas an mga bitis.

Totoo, an pagkamoot ngani minsan garo pisi

sa kublit mahaldat kun pagkabugkos higot.

Ata na, dai paghalaton na pugulan ta ka.

Dai palatawon sa boot an mga nakaaging

nasa pagultanan kan gatol asin kulog.

Asin kun an daghan nagigirukan

sa hamis kan mga girumdom, patagasa,

ta an hibo baga kan alalaso nakakalibaka

dawa ngani magatol, magirok.

Bayae na lapagon ka kan sakong pagmansay

mantang tinutugdas mo an dalan

na luhay-luhay pinapara kan saimong mga dapan.

Sa doros ihihinghing ko na sana an pangadieon

na sa saimong paghali lugod nadara mo man

an pagkamoot na siring sa minasbad,

nagwalat nin lugad sa sakuyang kalag.

Pagkagimata

Nangiturugan ako:

Kinakalag ako nin mga tataramon

na haloy ko nang ginadan.

Sa pag-gadan, an boot kong sabihon,

bako sana an paghabon nin buhay

alagad an dai pagpamundag.

Iyong gayo. An mga tataramon buhay.

naghihiro, naghahangos

sa kada segundo kan ginhawa:

Marambong na sipres

na minatalubo sa tatamnan

nin pagkaaram asin pagkamidbid.

Ay, makamumundo nanggad

na an mga tataramon na kadto buhay

sa gira kan lapis asin sa layog

kan doros gikan sa daghan,

luhay-luhay naootkan dangan

dagos nang napapatodan

nin hinangos sagkod magadan.

Ang kagadanan, uuliton ko,

bako sana an pagkawara nin buhay

kundi an dai pagkapamundag.

Magtubod ka baya sako ta ako

paragadan nin tataramon.

Sa mga tataramon ko pitong ribo an gadan,

Si ibang natada, naghihingagdan.

(Asin ako nagimata!)